Igorreko harrobietan lan egin zuen, eta bere anaia Jose «Lagun» delakoari laguntzen zion, Josek zuzentzen zuen bizartegi eta zapata dendan. 1936ko uztailean Gerra Zibila hasi ondoren, Arana Goiri batailoiko Gorbea konpainian izena eman zuen, boluntario. Gorbeiako, Legutioko, Saibigaineko eta Gernikako fronteetan borrokatu zen, besteak beste. 1937ko abuztuan Eusko Gudarosteak Santoñan eta Laredon amore eman ondoren, zenbait kontzentrazio esparrutan espetxeratuta eduki zuten (Santoña, Miranda Ebro, Puente Genil, Castuera, Algeciras), harik eta 1939ko abenduan askatu zuten arte.

1940an Bilboko Indautxura joan zen bizi izatera, eta 1971 arte Euskalduna ontzioletan lan egin zuen. Urte haietan zehar, ogibide zuen lan hori jarduera folklorikoekin uztartu zuen, hainbat euskal dantza taldetan sortzaile, laguntzaile eta irakasle izanik, hala nola: Dindirri, Arraizpe, Beti Alai, Txindor, Gaztedi, Galdakaoko Andra Mari, Ballets Olaeta, Beti Jai Alai eta Bizkai. Jarduera horietan, euskal folkloreko pertsona handiekin batera aritu zen: Manu Gerrikabeitia, Martin Pertika, Patxi Arrese, Alejandro Intxaurbe, Elías Pradera, Txelu Etxebarria, Iñaki Irigoien, Sabino Larrea, Segundo Olaeta, Jon Pertika eta Sabin Egigurenekin, besteak beste.

Hiru bira egin zituen Ipar Amerikan 1967, 1968 eta 1970ean; guztira 190 emanaldi egin zituen Estatu Batuetan, eta 11 Kanadan (35 eta 6 estatutan, hurrenez hurren). Bira horiek Victor Olaetak zuzendutako Olaeta Basque Festival of Bilbao ikuskizunaren parte ziren, eta Boni Fernandez txistulariak lagundu zion, besteak beste.

1987, 1989 eta 1990ean, hiru bira egin zituen Hego Amerikan; guztira 75 emanaldi egin zituen Argentinan, Brasilen, Txilen eta Uruguain. Gainera, 500 ongintza, kultura eta gizarte emanaldi baino gehiagotan parte hartu zuen, La Caravana de la Alegría ongintzako elkartearekin, Manolo Leguina, Guillermo Etxebarria «Artxanda» eta Juan Carlos Roelekin, besteak beste.

Hainbat dokumental nabarmenetan parte hartu zuen, hala nola Fernando Larruquertek zuzendutako Euskal herri-musika (1978) eta Esther Korta eta Aitor Zamalloaren Dantzan-Gorbeialdea (1998) dokumentaletan. Telebistako saio askotan ere agertu zen, besteak beste Estudio abierto (TVE2, José María Íñigok zuzendua, 1974-04-19), La Banda del Mirlitón (TVE1, 1976-02-22) eta Bailando hasta morir (ETB2, Antxon Urrusolok zuzendua, 1991-10-10) saioetan.

Parte hartu zuen 38 diskotan, 84 doinurekin (28 albokakoak, eta 56 pandero eta ahotsarekin); horien artean, nabarmentzekoak dira Trikititxa: Txilibrin y Balbino eta Berrizko itsuari…, Mikel Urbeltzek egina, eta Manuel García Matos, Juan Manuel Ares, Juan Antonio Urbeltz eta Juan Mari Beltranek zuzendutako zenbait antologia musikal.

Jendaurreko azken emanaldia, alboka jotzen, panderoa jotzen eta abesten, 1998ko ekainaren 21ean egin zen, Bilboko Arriaga antzokian, 75 urtez agertokietan aritu ondoren.

Bilbon hil zen, 2003ko uztailaren 30ean